Um felagið

Felagið Føroyskir Sálarfrøðingar verður stovnað

Marita Petersen, cand.pæd.psych., sála og Jan Willemoes, cand.psych et cand.merc. vóru nøkur av teimum, sum tóku stig til at seta felagið Føroyskir Sálarfrøðingar á stovn. Felagið varð stovnað 10. januar 2000 við tí endamáli at menna sálarfrøðiliga vitan og førleika í Føroyum.

Sáttmála við Heilstutrygd

Felagið hevur eisini til endamáls at tryggja føroyska borgaranum sálarfrøðiliga viðgerð. Avtala varð gjørd við Sjúkrakassarnar (seinni Heilsutrygd) og fatar um sálarfrøðiliga viðgerð í sambandi við kreppustøður av ymiskum slagi. Sáttmálin tryggjar at føroyingar, eftir ávísing frá kommunulækna, kunnu fáa sálarfrøðiliga viðgerð frá góðkendum sálarfrøðingum, sum eru fevndir av sáttmálanum. Borgarin skal sjálvur rinda 60% og Heilsutrygd rindar 40% av tí, viðgerðin kostar.

Sáttmálin tryggjar ikki viðskiftafólki fult endurgjald enn, men Felagið Føroyskir Sálarfrøðingar arbeiðir fyri, at tað ikki skal vera ein fíggjarligur trupulleiki at fáa sálarfrøðiliga viðgerð, men at sálarfrøðilig viðgerð skal kunna veitast føroyingum eins og læknalig viðgerð verður veitt.

Menna sálarfrøðiliga vitan, innlit og førleikar í Føroyum

Sum liður í at menna sálarfrøðiliga vitan, innlit og førleikar í Føroyum, hevur felagið bjóðað almennu Føroyum til tiltøk og verkstovur við sálarfrøðiligum evnum. Fyrstu ferð var í 2000, tá stór ráðstevna varð hildin við seks norskum sálarfrøðingum; aðru ferð var í 2001, tá skipað varð fyri fleiri minni verkstovum við tveimum donskum sálarfrøðingum. Frá 2001 til 2011 varð skipað fyri fleiri internum skeiðum og verkstovum fyri føroyskar sálarfrøðingar, og í 2011 sniðgav Felagið Føroyskir Sálarfrøðingar Sálarfrøðiliga Fakfestivalin. 

Stovnan av Studentasektión

Sálarfrøðiligar tænastur vera alt meira eftirspurdar, bæði tá talan er um skeiðsvirksemi, tilbúgving, undirvísing, viðgerð og fakliga vegleiðing umframt ráðgeving og leiðbeining til einstaklingar, fyritøkur og felagsskapir - bæði almennar og privatar. Tað er okkara visión, at henda gongd heldur á til frama og gagns fyri borgarar, fyritøkur, feløg og land. Tí hevur Felagið Føroyskir Sálarfrøðingar sett á stovn eina Studentasektión, sum skal viðvirka og samvirka til at menna føroyska sálarfrøði og stuðla undir, at føroysk sálarfrøðislesandi koma aftur til Føroyar eftir loknan lesnað.